Израелската армија денеска соопшти дека нејзините војници извршиле „прецизна операција“ во болничкиот комплекс Шифа во Газа при размена на оган со палестинските борци.
Безбедносните сили кои оперираат во болницата Ал-Шифа во градот Газа беа под оган од палестински милитанти „од околината на болницата“ во текот на ноќта, соопштија израелската армија и Шин Бет.
„Војниците одговорија со оган и ударите беа идентификувани. Нашите војници продолжуваат да оперираат во областа на болницата“, се вели во соопштението на израелската армија, пишува „Тајмс оф Израел“.
Претходно, израелската војска соопшти дека спроведува операција во болницата поради „конкретни разузнавачки информации“ дека оперативците на Хамас се прегрупирале во болницата и планирале терористички активности.
Министерството за здравство на Газа, под контрола на Хамас, објави дека има мртви и ранети во рацијата, која започна во 02:00 часот по локално време.
Се наведува дека израелски возила се наоѓаат во дворот на болницата и дека израелските сили лансирале проектили и отвориле оган врз зградата на болничкиот комплекс Шифа, пренесува Ал Џезира.