Веејќи знамиња со сонцето од Вергина и скандирајќи „Никогаш Северна, само Македонија“, десетици иселеници од Македонија оддржаа протест пред македонскиот конзулат во Мелбурн, каде го симнаа македонското знаме од јарболот пред зградата и го поставија знамето со сонцето од Кутлеш.
Потоа, тие ја пееја македонската химна и ги запалија знамињата на Грција, Бугарија и Албанија и скандираа погордни пароли кон Албанците, а дел од демонстрантите ги запалија и макетите од картон на премиерот Зоран Заев и вице-премиерката Радмила Шекеринска.
Од СДСМ реагираат дека ова е уште еден од случаите на насилство, кое, според владејачката партија, го сее и потикнува опозициската ВМРО-ДПМНЕ.
„Покрај тоа што немаше партиска делегација да положи цвеќе на вечните почивалишта на поранешните претседатели Киро Глигоров и Борис Трајковски, ВМРО-ДПМНЕ сее омраза и поттикнува насилство. Последен пример за тоа е палењето слики на премиерот Зоран Заев и министерката за одбрана Радмила Шекеринска на собир во Австралија. ВМРО-ДПМНЕ и нивната заканувачка реторика се директните поттикнувачи на вакви срамни чинови“, соопштија социјалдемократите.
Од ДПМНЕ, пак, возвратија дека Глигоров и Трајковски се залагале за независна и суверена Република Македонија и го почитувале зборот на граѓаните искажан на референдумот од 1991 година, додека, велат од опозициската партија, владата на Зоран Заев и го смени уставното име на државата.
„СДСМ и Заев ги погазија делата за кои се бореа претседателите Киро Глигоров и Борис Трајковски. Да беа живи, Глигоров и Трајковски јавно ќе се откажеа од Зоран Заев и неговата антимакедонска политика. Најважно, Заев и СДСМ не ја испочитуваа искажаната волја на граѓаните, туку против волјата на народот го сменија името со потпишување на капитулантскиот договор во Преспа“, велат од партијата на Христијан Мицкоски.