Американскиот амбасадор во Србија Кристофер Хил денес изјави дека верува оти „Србија е способна да ги искористи историските можности“.
Тој на својот твитер профил објави видео порака што американскиот претседател Џозеф Бајден ја испрати до американските дипломати во светот, а во која објави дека светот е на крстопат и дека тоа што ќе се направи денес „ќе ги одреди животите на следните три или четири генерации“.
„Ова се пораки на претседателот Бајден до мене и моите колеги. Одлична порака за искористување на историските можности. Мислам дека Србија е способна за тоа“, напиша Хил.
Во видео порака до американските дипломати, Бајден изјави и дека САД имаат визија за позитивна иднина.
„Нашата визија е позитивна иднина. Сакаме да градиме со другите, а не против нив. Да се ангажираме со нив во заеднички интереси, да им помогнеме на земјите во развој да им обезбедат повеќе на своите граѓани“, рече Бајден.