Фракцијата на ДУИ е подготвена посебно да номинира свој претставник во работната група за уставните измени со кои Бугарите треба да се вметнат како една од заедниците во Преамбулата. Од таканаречената „Огнена група“ се со став дека целосно ги поддржуваат измените, но покрај за Бугарите, бараат и замена на формулацијата „20 отсто“ со „албански јазик“.
„Имајќи предвид дека евроатлантските интеграции за нас претставуваат приоритет над приоритетите, сакаме да истакнеме дека цврсто ги поддржуваме уставните измени. Следствено, сакајќи во овој процес да имаме активна, а не само набљудувачка улога, иако официјално не сме поканети, ја изразуваме нашата целосна подготвеност како фракција во рамките на ДУИ да учествуваме во работната група за уставни измени и да ги ставиме на располагање на државата сите наши професионални капацитети“ – велат од фракцијата на владејачката партија.
Во однос на отстранување на формулацијата „20 отсто“ и вметнување на албанскиот јазик, тие го повикуваат целиот албански политички блок да се произнесе за темата и да ја поддржи иницијативата бидејќи покрај новото поглавје на патот кон ЕУ, според нив, ќе се исправи и децениска неправда кон албанскиот народ.
Владејачката ДУИ го номинираше Арбр Адеми, пратеник и координатор на пратеничката група за свој претставник во работната група за уставните измени.
СДСМ ја предложи генералната секретарка на Собранието, Цветанка Иванова, а Алијанса за Албанците го номинираше пратеникот Ремзи Мехмеди.
ВМРО-ДПМНЕ, Алтернатива, Левица, СПМ и Демократскиот сојуз, пак, соопштија дека нема да номинираат свои претставници.
Од останатите институции, досега официјално е познато дека како претставник на кабинетот на претседателот на државата е правниот советник и универзитетски професор Александар Спасов.
Свои претставници ќе имаат и Министерството за надворешни работи и Секретаријатот за европски прашања.
Од Министерството за правда денеска најавија дека утре ќе го соопштат составот на работната група.