626
Седумдесет отсто од граѓаните кои имаат кредити во банките и штедилниците ја искористиле можноста за одложување на исплата на ратите поради корона кризата, објави Македонската банкарска асоцијација, врз основа на првичните податоци од сите нивни членки.
„Сите наши членки нудат можност физичките лица коишто ја прифатиле понудата, а во следните месеци ќе сакаат и ќе бидат во можност да продолжат со плаќање на кредитите, да се изземат од понудата. Исто така, нашите членки ќе излезат во пресрет и на барањата на своите клиенти коишто сега ја одбиле понудата, а во натамошниот период ќе проценат дека имаат потреба од привремено олеснување на финансискиот товар, дополнително да се приклучат кон понудата и наплатата на кредитот да им се одложи до завршување на грејс-периодот предвиден со понудата“, велат од МБА.
Во однос на правните лица, од таму посочуваат дека понудите се усогласуваат со секој клиент одделно, во зависност од неговите потреби.