Техничкиот министер за внатрешни работи Наќе Чулев до Координативниот кризен штаб во Владата предложил за претстојниот викенд за Денот на трудот да нема продолжен полициски час, како што беше за велигденските празници.
Наместо тоа, предлага полицискиот час да почнува исто како изминатиов викенд, кога забраната за движење започна во сабота од 15 часот, а траеше до 5 часот наутро во понеделник.
„Во пресрет на продолжениот викенд за 1 мај, сметам дека Владата треба да донесе одлука која ќе биде идентична на изминатиот викенд. Секое ограничување кое ќе биде построго и поригирозно негативно ќе се одрази на граѓаните “,- напиша Чулев на својот фејсбук профил.
Тој се осврна и на движењето во планини и шуми, кои, како што вели, треба да се користат за рекреирање, но не и за групирање.