Палењето на Куранот во последните денови создаде зголемен безбедносен ризик во земјата, предупреди во средата безбедносната служба Сакерхетсполисен.
„Нашата проценка вели дека палењето на Куранот ја влоши безбедносната состојба во земјата“, пренесе Хина, повикувајќи се на агенцијата ДПА.
Поради палењето на Куранот во Шведска и Данска, кое го организираа помали исламофобични групи, во неколку муслимански земји имаше гневни протести, особено во Ирак, кој поради тоа го протера шведскиот амбасадор.
Демонстрантите дури упаднаа во шведската амбасада во Багдад и ја запалија.
Сакерхетсполисен предупредува дека акциите на палење на Куранот ја доведоа во прашање репутацијата на Шведска како толерантна земја.
„Шведска сега се смета за непријателска кон исламот и муслиманите. Ова ја вклучува перцепцијата дека нападите врз муслиманите се толерираат и дека муслиманските деца се киднапирани од социјалната служба“, тврдат од Сакерхетсполисен.
Ова, се додава, „ја зголемува опасноста од закани од поединци во насилна, исламистичка средина“.
Агенцијата предупредува дека шведските безбедносни служби често се справуваат со закани насочени против шведските граѓани и шведските интереси во странство.