Американскиот претседател Џозеф Бајден изјави денеска дека израелската влада ќе ја загуби меѓународната поддршка доколку не го омекне својот став за војната во Газа.
„Израел имаше огромна поддршка од огромното мнозинство земји. Ако продолжат со оваа неверојатно конзервативна влада што ја имаат, ќе ја изгубат поддршката од целиот свет, а тоа не е во интерес на Израел“, рече Бајден за NBC.
Бајден претходно изјави дека се надева оти до следниот понеделник ќе биде постигнат прекин на огнот меѓу Израел и Хамас.
„Мојот советник за национална безбедност ми вели дека сме блиску, но преговорите се уште не се завршени. Се надевам дека следниот понеделник ќе имаме примирје“, рече Бајден за време на посетата на Њујорк.
Во конфликтот меѓу Израел и Хамас, кој започна на 7 октомври минатата година, досега загинаа повеќе од 29.000 Палестинци и околу 1.300 Израелци.