Апелациониот суд ја укина првостепената пресуда за Ангела Ѓорѓиевска која беше осудена на 19 години затворска казна за убиството на Пино Секондо.
Информацијата за „Фокус“ ја потврдија од второстепениот суд.
– Првостепената пресуда е укината и случајот е вратен на повторно судење пред првостепениот суд, велат од Апелација. Според нашите информации, притворот за осудената е продолжен, а пресудата била укината поради суштествени повреди во постапката. Одлуката била донесена во јули, а претседател на советот бил судијата Јани Нича.
Деновиве треба да биде објавена одлуката и јавноста да дознае зошто второстепениот суд ја укинал пресудата за Ангела која ја донесе судијката Ленка Давитковска.
Ѓорѓиевска беше осудена во јули 2020 година , за помагање во извршување на убиството кое според доказите го сторил Али Фуркан кој е во бегство.
Тој со пушка го застрелал во главата Пино во присуство на Ангела која помогнала безживотното тело да го внесат во кола, а подоцна и да го закопаат во атарот на Љуботен.
Судијата при изрекување на пресудата истакна дека во одредување на казната биле земени предвид олеснителните и отежителни околности кои надвладеале бидејќи обвинетата Ангела Ѓорѓиевска во текот на судењето никогаш не покажала каење.
Пино со месеци се водеше како исчезнат, а потоа случаен минувач најде остатоци од неговото тело.
Ф.Ф.С.