Вицепремиерот задолжен за економски прашања, Кочо Анѓушев учествуваше на бизнис форумот, во рамките на Четвртиот Самит за Западен Балкан во Трст, Италијанска Република.
„Не е возможно да зборуваме за економски раст на земјата, ако не работиме на поддршка и стимулирање на извозот на компаниите кои работат во Република Македонија. Пазарот од два милиони луѓе е мал и пред сè треба да ги поддржиме нашите компании да растат и да бидат конкурентни во регионот, а потоа и во ЕУ. Владата силно ќе ги поддржи извозно ориентираните компании, да растат, да се развиваат и да создаваат производи со повисока додадена вредност.
Ќе работиме на создавање на бизнис амбиент за здрави и успешни компании, а не да се создават политички компании од страна на власта. Изградбата на инфраструктурата ќе ни биде приоритет, ќе работиме на изградба на патната инфраструктура и гасификација на земјата, а токму преку изградба на инфраструктура ќе докажеме дека сме силно посветени на регионално поврзување“, изјави вицепремиерот Анѓушев.
Тој се осврна и на политиката за привлекување на странски инвестиции во земјата.
„Од Трст испраќам порака и покана до сите странски инвеститори дека се добродојдени во Република Македонија. Како Влада ќе го поддржиме секој инвеститор и гарантираме безбедност на нивниот капитал“, нагласи Анѓушев.
Реформите во енергетскиот сектор се исто така еден од приоритетите, но и предизвик на македонската Влада, според вицепремиерот Анѓушев.
„Ќе го донесеме и усвоиме новиот Закон за енергетика во кој ќе бидат инкорпорирани Третиот енергетски пакет на Европската унија и мерките препорачани од Енергетската заедница. Владата ќе работи на поддршка за изградба на енергетски капацитети од обновливи извори на енергија, а поддршката ќе ја моделираме на комерцијална основа“, рече Анѓушев.
Самитот за Западен Балкан во Трст е четврти по ред, а е дел од активностите кои се одвиваат во рамките на „Берлинскиот процес“, иницијатива на Европската Унија, со цел убрзување на процесот на интеграција на земјите од Западен Балкан во Унијата.