Спасувачките екипи во средата пребаруваа низ урнатините на бомбардирана станбена зграда во Газа, која се урна во текот на ноќта, при што загинаа најмалку 20 Палестинци, вклучително и деца, додека десетици други останаа заробени под урнатините.
Десетици илјади Палестинци живеат во околу 2.000 згради оштетени од израелските воздушни напади низ Појасот Газа.
Службата за цивилна заштита на Газа соопшти дека најмалку 20 лица, меѓу кои шест деца, загинале, а 14 биле повредени при уривањето на седумкатницата. Се верува дека под урнатините сè уште има околу 100 луѓе.
На снимките што ги виде агенцијата „Ројтерс“ се гледаат спасувачи како се обидуваат да извлечат две лица од под урнатиот ѕид. Друго видео на социјалните мрежи прикажува како портпаролот на цивилната заштита на Газа, Махмуд Басал, носи мало девојче завиткано во шал извалкан со крв.
Директорот на Службата за цивилна заштита на градот Газа, Ред Ал-Дахшан, изјави дека во урнатата зграда живееле најмалку 10 семејства и дека сè уште постои надеж оти ќе се најдат преживеани.
„Сè уште слушаме гласови под урнатините“, рече Дахшан.