Од Кривичниот суд информираат дека почнувајќи од денеска ќе се судат само предметите во кои еден или повеќе обвинети се во притвор. Ова значи дека и случајот “Рекет”, за кој има голем интерес во јавноста, ќе продолжи да се суди, бидејќи обвинетиот Бојан Јовановски е во притвор, а Катица Јанева во куќен притвор.
Воедно судот ќе постапува и по сите итни предмети за кои се надлежни кривичните совети, а по кои се постапува на нејавни седници.
За таа цел изготвена е листа од 39 притворски предмети, насрочени во следните 30 дена за кои предмети странките кои имаат усна или писмена покана се должни да дојдат на закажаното судење, додека странките во сите други постапки кои не се наведени на листата ќе добијат дополнителни покани за следните термини.
Согласно Уредбата со законска сила за роковите во судските постапки за време на вонредна состојба, усвоена на седница на Влада на РСМ на 30.03.2020 година, судот со новата листа на предмети значително го намали бројот на насрочени расправи, а со тоа и фреквенцијата на луѓе во судот како дел од препораките за заштита од ширење на вирусот.
Како суд уште еднаш апелираме и до сите странки, кои се дел од новата листа на приоритетни предмети, доследно да ги почитуваат прораките и мерките за заштита, а судот ќе продолжи со редовни дезинфекции на судниците и другите простории, мерење на температурата со бесконтактни уреди на сите кои ќе влезат во судот и задолжение за носење медициснки маски и стерили ракавици.
НАПОМЕНА – листата зависно од потребите ќе биде ажурирана и надополнета за што јавноста ќе биде дополнително известена, се вели во соопштението на судот.