Жител на Горно Коњаре осомничен за обид за убиство и за напад врз полициски службеници. Основното јавно обвинителство донесе наредба за спроведување истражна постапка против триесет и четиригодишниот осомничен поради постоење основано сомнение дека сторил кривични дела обид за убиство и напад врз службено лице.
Тој вчера имал кратка караница со друго лице, по што осомничениот отишол во неговиот дом од каде зел нож и го прободел лицето во пределот на слабината, нанесувајќи му тешки телесни повреди од животозагрозувачки карактер.
Околу половина час подоцна, осомничениот сериозно се заканил дека ќе ги нападне четворицата полициски службеници кои постапувале по наредба да го лишат од слобода заради претходно стореното кривично дело. Кога полициските службеници дошле во неговиот дом, тој излегол на вратата, повторно држејќи нож во рацете. Еден од полициските службеници му наредил да го фрли ножот, но осомничениот одбил да го стори тоа и им се заканил. Полициските службеници се повлекле во дворот и застанале во близина на службеното полициско возило, а осомничениот започнал да им се приближувасо крената рака во која го држел ножот. Во тој момент, еден од полициските службеници му се приближил на осомничениот и со употреба на средства за присилба му ја фатил раката, ножот паднал на земјата и осомниченото лице било лишено од слобода, соопштуваат од Основното јавно обвинителство.
Надлежниот јавен обвинител до судијата на претходна постапка од Основниот кривичен суд Скопје достави предлог за определување мерка притвор, бидејќи постојат околности кои укажуваат дека осомничениот би можел да се даде во бегство, да влијае врз сведоците или вештаците, како и дека ќе го повтори кривичното дело или ќе го доврши обиденото кривично дело.