Веста дека еден американски долар ја надмина симболичката граница од 100 руски рубљи е денес во фокусот на западните медиуми.
Ројтерс објави дека „Кремљ ја обвинува лабавата монетарна политика бидејќи рубљата се спушта над 101 наспроти доларот“. Руската централна банката пак соопшти дека „не гледа закана за финансиската стабилност на Русија од обновениот пад на рубљата“.
CNN објави коментар „Руската рубља го достигна најниското ниво во последните 17 месеци во однос на доларот, бидејќи војната во Украина гризе“. Во коментарот, покрај западните санкции, како и намалениот извоз и зголемениот увоз, се истакнуваат и зголемените трошоци за тековната војна во Украина, односно, удвоените трошоци за армијата и одбраната во 2023.
Блумберг објави дека „Рубљата потона на 100 за долар бидејќи санкциите ја задушуваат Русија“, а Форбс истакнува дека „Условите на меѓународната трговија се клучен двигател на вредноста на рубљата, особено за клучниот руски извоз на енергија.“ Во написот на Телеграф, „Рубљата паѓа, а Кремљ ја обвинува „меката монетарна политика“, се укажува дека рубљата продолжува да паѓа, и по мерката од минатата недела за прекин на купувањето девизи на домашниот пазар до крајот на годината, во обид „да се намали нестабилноста“. Исто така, се пoсочува дека „неуспешниот бунт на платениците од групата Вагнер фрли дополнителен сомнеж за стабилноста на руската економија.“
Пребарувачот Google дава податок дека една руска рубља денес се менува за 0.56 денари, што е двојно помала вредност од 25 септември 2022, кога рубљата беше посилна од денарот и изнесувала 1.11 денари.