Бугарија ја поддржува рамката за преговори за пристапување на Албанија во Европската Унија, но не и на С. Македонија, изјавила бугарската министерка за надворешни работи Екатерина Захариева на брифинг со бугарските новинари, пренесува БГНЕС.
Таа вели дека Бугарија инсистирала на три услови во рамката за преговори со Македонија, но тие не биле вклучени во неа.
-Ние инсистиравме на три основни услови да бидат поставени во преговарачката рамка. Првиот е придржување до формулата за јазикот од 1999 година, временска рамка за имплементација на Договорот од 2017 и многу јасна определба дека нема да се поддржуваат претензиите за македонско малцинство во Бугарија. Овие услови се уште не се вклучени, рече Захариева.
Според неа, треба да се вложат повеќе напори во преговорите отколку во кампањата за оцрнување против Бугарија. Таа вели дека ваква кампања можела да се види најмалку три пати, „пред потпишувањето на Договорот, по одобрувањето на позицијата на парламентот и сега уште еднаш“.
-Поентата на подготовка за членство е да се направи сојузот посилен. Ако на масата на ЕУ има нерешени прашања, како што има меѓу некои земји-членки, тоа нема да ја направи ЕУ посилна, рече Захариева.
Земјите-членки попладнево треба да дебатираат за Северна Македонија и за Албанија, но не се очекува да биде донесена одлука на денешниот состанок за усвојување на преговарачката рамка.