Дефинитивно недоволниот капацитет на продукција и на фајзеровите и на сите други вакцини во светот е причината за доцнењето на вакцините кај нас. Верувам дека се навистина денови во прашање. Нашата земја има преземено се што е неопходно за да може час поскоро да набавиме вакцини, нагласи премиерот Зоран Заев при денешниот увид на изградба на детска градинка и центар за деца од улица во Шуто Оризари.
Тој, одговарајќи на новинарско прашање околу вакцинацијата за Ковид-19 во земјава, нагласи дека секако не сме членка на Европската Унија и сме надвор од земјите членки на ЕУ и во такви околности, како што рече, сме преземале дејствија коишто значат склучување на договори, склучување на анекси на договори, некаде дури и авансирање пари се со конечна цел да ги склучиме договорите со сите постоечки вакцини.
Тој посочи дека последната на којашто се работи е вакцината на Астра Зенека.
– Значи ги имаме преземано дури и чекорите на линија на црвената граница во функција на количините, дури и ако треба да поминат количини кои на крајот не би се имплементирале, но да имаме нарачки на крај. Така беше последната нарачка за стоте илјади спутникови вакцини, но секако имаме дуплирани нарачки од Кина, 200 по 200 илјади вакцини, осумстотини илјади преку Ковакс механизмот, 833.000 директно со Фајзар којшто се склучени, договорите кои што ги имаме со ЕУ заради Западен Балкан… Кога ќе ги правите пресметките поминуваме преку два милиони вакцини. Проценките беа милион, значи сме направиле се што треба да направиме, нагласи премиерот.
Заев посочи дека Фајзер најавиле дека прво ќе добие вакцина Албанија, потоа Северна Македонија, потоа Црна Гора, Косово и БиХ.
– Видовме во Албанија стигнаа вакцините, овие денови очекуваме првите пратки од директниот договор со Фајзер да стигнат кај нас, потенцираше премиерот.
