Текстот е објавен на 4 ноември, 2016 година во неделникот „Фокус“ во број 1100
Пишувала: Ирена МУЛАЧКА
Јохан Тарчуловски е единствениот осуден од Македонија за воени злосторства во Хаг за случајот Љуботен, настан од воениот конфликт во 2001 година, каде што беа убиени неколкумина цивили, а според пресудата од Хашкиот трибунал, акцијата ја планирал и ја спровел токму Тарчуловски. Тој прво беше осуден на 12-годишна затворска казна, која подоцна му беше намалена на осум години, од кои шест години помина во Шевенинген, а останатиот дел го одлежа во германскиот затвор Диез.
По осум години поминати во затвор, во 2013 година се врати дома, а во Скопје беше пречекан како херој. Тарчуловски на аеродромот го пречекаа тогашниот премиер Никола Груевски, највисоките раководители на ВМРО-ДПМНЕ, неговото семејство и илјадници поддржувачи кои во него гледаа вистински патриот, бескомпромисен борец за Македонија.
Шефот на државата Ѓорге Иванов и експремиерот Груевски му приредија и официјален пречек во своите кабинети, прифаќајќи го како бранител кој ја поднел најголемата жртва за државата, без оглед на кривичните дела за кои одлежа затворска казна.
Тарчуловски, пак, оттогаш нескромно и јавно му дава целосна поддршка на лидерот на ВМРО-ДПМНЕ и редовно е присутен на партиските митинзи. Пред две недели, на собирот во салата „Борис Трајковски“, Тарчуловски одржа говор во кој истакна дека најмногу треба да се сака татковината, а дури потоа својот сопствен живот. Според него, богатството и политичката кариера се најмалку важни.
– Ние народот сме тие кои први треба да излеземе кога ни е најтешко, ние сме луѓе кои не бараме многу, не летаме во облаци, но сакаме да нѐ ценат, да нѐ вреднуваат – истакна Тарчуловски.
Но, дали навистина за него политичката кариера и парите се најмалку важни? Фактите говорат оти Тарчуловски е само три години на слобода, а вртоглаво напредува на сите полиња.
Според тоа што може да се види на неговиот фејсбук-профил, Тарчуловски е организациски секретар во владејачката партија, а за време на локалните избори во 2013 година, неговото име се вртеше и во комбинација за кандидат за градоначалник на Општина Бутел.
Веднаш по враќањето од Хаг, тој експресно почна со полагање испити на Земјоделскиот факултет на штипскиот универзитет „Гоце Делчев“, каде што подоцна и дипломираше. Покрај учеството во партиските активности на ДПМНЕ, тера и успешен бизнис од кој заработува милионски суми.
ФИРМА ЗА ТРАНСПОРТ СО ОГРОМНИ ПРИХОДИ
Според документите од Централниот регистар, Тарчуловски е сопственик на фирмата „Мел-Ком транс Дооел“, чиј управител е неговата сопруга Соња Тарчуловска. Се претпоставува дека фирмата името го добила според името на нивната ќерка, која се вика Мелани. Седиштето на фирмата се наоѓа на улицата Народни херои во скопската населба Кисела Вода, односно во истата населба каде што семејството Тарчуловски има и семеен стан.
Во документите, исто така, може да се забележи дека станува збор за фирма чија приоритетна дејност е товарен патен транспорт (транспорт со камиони). Фирмата е основана е на 21 јули, 2008 година што значи дека на пазарот опстојува цели осум години, односно била основана во периодот додека Тарчуловски веќе две години ја издржувал затворската казна во Шевенинген. Оттука се поставува прашањето како фирмата функционирала цели шест години, до 2013 година, додека Тарчуловски бил во затвор? Кој бил задолжен за нејзиното работење, неговата сопруга или некој од неговите партиски другари?
Податоците од Централниот регистар, исто така, покажуваат дека „Мел-Ком Транс ДООЕЛ“ е регистрирана со почетен паричен влог од 10.000 евра, но на документите може да се забележи и сума од 22 илјади евра, која се води како непаричен влог, што се претпоставува дека се работи за опрема, објекти или камиони.
Според документите со кои располагаме, фирмата остварува големи приходи. Само во 2014 година „Мел-Ком Транс“ имала вкупни приходи од 269.733 евра, додека расходи од 261.159 евра. Една година подоцна приходите се зголемуваат на 343.729 евра, а расходите достигнуваат 336.192 евра.
Според нашите информации, камионите на Тарчуловски работат за рудникот „Саса“, но не успеавме да потврдиме што точно превезуваат и каде. Се обидовме да воспоставиме контакт и со Тарчуловски за да му поставиме неколку прашања поврзани со работата на фирмата, но тој не одговараше ниту на нашите телефонски повици, ниту на смс пораките. Исто така, „Фокус“ испрати прашања и на официјалниот мејл на фирмата, но и од таму не добивме ништо повратно.
ДАЛИ ТАРЧУЛОВСКИ ИСПРАТИ ПИСМО ДО ГРУЕВСКИ ЗА ХАШКИТЕ СЛУЧАИ?
Името на Тарчуловски, еден од поранешните водачи на фудбалските навивачи на ФК Вардар – Комити, стана познато во јавноста во 2005 година кога заедно со ексминистерот за внатрешни работи Љубе Бошкоски беа обвинети од Хашкиот трибунал за акцијата во селото Љуботен во август 2001 година. Според пресудата во Хаг, Тарчуловски кој во тоа време беше дел од обезбедувањето на починатиот претседател на државата Борис Трајковски, во акцијата на 12 август во селото Љуботен учествувал на своја рака. Револтиран од тоа што претходно на 10 август осуммина припадници на безбедносните сили загинаа од противтенковски мини кај месноста Љуботенски бачила, тој заради одмазда формирал паравоена единица, која под негова команда се упатила во селото да ги пронајде припадниците на ОНА кои ги подметнале мините. Во вооружените пресметки во селото од единицата која ја предводел Тарчуловски настрадале шест жители на селото и биле запалени 14 куќи.
Додека Тарчуловски беше во хашките зандани, по изборите во 2011 година, ВМРО-ДПМНЕ и ДУИ повторно формираа заедничка влада. Како услов за старо-новата коалиција интегративците побараа амнестија на хашките случаи – предметите за одговорноста на ОНА за воените злосторства во 2001 година, кои Хашкото обвинителство ги врати во Македонија. Во Собранието тогаш се кршеа копјата за донесувањето закон за амнестија, за што најжестоко реагираше опозицијата. Во целата оваа приказна се вмеша и Тарчуловски кој наводно испратил писмо до експремиерот Груевски и му дал зелено светло барајќи да се амнестираат хашките случаи.
– Премиере Груевски, покажи доблест да се затвори и ова последно поглавје од 2001 година. Разговарајте за тие хашки случаи, проверете ги законите и ако има можност решете го тоа прашање еднаш и засекогаш, запрете ги и оставете ги во историјата, завршете ги сите трауми од минатата деценија. Ако избираш помеѓу тоа да ја трошиш енергијата на создавање нови дела, да градиш и да им помагаш на луѓето и помеѓу тоа да го оптоварувате општеството и иднината со овие случаи, одбери го првото. Овие случаи треба да ги стопираме и вратиме во историјата и да одиме напред, да градиме наместо да разградуваме – се наведуваше во писмото од Тарчуловски до Груевски.
Тој, понатаму во писмото продолжува дека хероите ќе се паметат вечно, но со одење напред најдобро ќе се одолжат за нивната жртва.
– Патриотски пред десет години беше да се одбрани Македонија. Денес е патриотски да се овозможи Македонија да оди напред, ослободена од бремето на минатото. Знаеме дека Македонија не беше крива во 2001 година. Еден ден и историјата ќе си каже, ама денес е најдобро да се избере најдобриот интерес за Македонија. Ако стопирањето и затворањето на хашките случаи стои на тој пат, тогаш запрете ги, нека оди Македонија напред, ја имате целата моја поддршка. Така размислува патриот – продолжува понатаму во писмото Тарчуловски.
Но, по јавното објавување на писмото останаа неодговорени многу прашања. Прво, писмото беше адресирано од Хаг во период кога Тарчуловски веќе две недели беше префрлен во затвор во Германија. Оттука почнаа да се плетат приказните – дали Тарчуловски воопшто го испратил писмото или тоа е напишано во штабот на ВМРО-ДПМНЕ и наводно потпишано од него, сакајќи на тој начин да се покријат за амнестијата на Хашките случаи, објаснувајќи и на македонската јавност дека дури и единствениот осуденик за воени злосторства е спремен да им ги прости злосторствата на припадниците на ОНА, само за Македонија да оди напред.
Former Macedonian Interior Minister Ljube Boskovski (L) and former police chief, Johan Tarculovski, arrive in the courtroom of the UN war tribunal in The Hague July 10, 2008, to hear their verdict on charges of murder, wanton destruction of civilian property and cruel treatment against Albanians in the village of Ljoboten in 2001. Tarculovski is convicted for 12 years imprisonment, Boskovski was cleared of the charge. REUTERS/Olaf Kraak/ANP/Pool (Netherlands)
КАВГИ МЕЃУ ТАРЧУЛОВСКИ И БОШКОСКИ
Покрај Тарчуловски и тогашниот прв полицаец Љубе Бошкоски во 2005 година се најде во притвор на Хашкиот трибунал во Шевенинген осомничен за воени злосторства врз цивилите во акцијата Љуботен. Но, три години подоцна, по одржаниот судски процес, поранешниот прв полицаец доби ослободителна пресуда, додека за истото дело Тарчуловски беше осуден на 12-годишна затворска казна.
Ексминистерот за внатрешни работи беше пречекан од екс премиерот Груевски и илјадници негови поддржувачи, а Тарчуловски остана да ја одлежува затворската казна. Само една година подоцна, откако избија политички разлики помеѓу Бошкоски и ВМРО-ДПМНЕ, почнаа кавгите меѓу Тарчуловски и Бошкоски. Провладините медиуми објавија видеоснимки од наводното сведочење во Пула на поранешниот министер за внатрешни работи, според кое, тој наводно го предал Тарчуловски пред хашките истражители за да добие ослободителна пресуда. Во тој период ДПМНЕ и поддржувачите на Тарчуловски го етикетираа Бошкоски за велепредавство. Дури, сопругата на Тарчуловски му посвети и песна на „предавникот“.
Но, тука не застанаа обвинувањата против Бошкоски. Само неколку месеци по излегувањето на снимките, Тарчуловски и Бошкоски очи во очи се сретнале во ходниците на Хашкиот трибунал, каде според пишувањата на медиумите Јохан му се обратил на Бошкоски: „Љубе, тргни ми се, не сакам да те видам“
Ексминистерот за внатрешни работи во 2011 година повторно заврши зад решетки, овојпат во Македонија за случајот „Кампања“, кој му го намести власта, затоа што политички се одметна и жестоко и се спротивстави. Бошкоски одлежа петгодишна затворска казна во Идризово од каде што излезе само пред неколку месеци. За разлика од него, Тарчуловски и остана верен и лојален на партијата и продолжува успешно да напредува во политичката кариера и во бизнисот.
Рамка
ТАРЧУЛОВСКА ПРЕД ТРИ ГОДИНИ ПАДНА ОД ТЕРАСА
Пред три години, Соња Тарчуловска, сопругата на Јохан падна од терасата во нивниот семеен дом во скопската населба Кисела Вода. Таа имаше тешки повреди и веднаш беше пренесена на скопските клиники. На социјалните мрежи веднаш почнаа да се плетат приказни за нејзиниот пад од терасата, за што го обвинуваа нејзиниот сопруг. МВР излезе со информации дека се работи за несреќен случај и дека таа паднала додека раскитувала од свадбата. Истото го потврди и Тарчуловска која подоцна за дневниот весник „Вест“ раскажала сѐ за падот, тврдејќи дека се работи за несреќен случај.