ВМРО и ДУИ се борат за член повеќе во собраниската комисија за избори и именувања

by Фокус 15:38
15:38

Откако пратениците на СДСМ и албанските партии покренаа иницијатива претседавачот на конституитивната седница Трајко Велјановски да свика продолжение на седницата, со цел да се комплетира конституирањето парламентот со избор на претседател и членови на собраниските тела, прв следен предизвик е формирање на парламентарната Комисија за избори и именувања, која, меѓу другото, предлага состав на постојаните и повремени работни тела и делегации на парламентот.

Формирањето на оваа комисија всушност е трета точка на првата собраниска седница по декемвриските парламентарни избори, на која се верификуваа мандатите на пратениците, но конституирањето на комисијата и изборот на претседател на законодавниот дом не дојдоа на дневен ред, бидејќи политичките партии беа далеку од договор за формирање на парламентарно мнозинство, односно на нова влада.

- Advertisements -

Според партиски извори, формирањето на комисијата, која треба да има 13 члена, ќе оди тешко, бидејќи ВМРО-ДПМНЕ инсистира од оваа партија да доаѓаат 6 члена, при еден од нив би бил претседател на комисијата, додека СДСМ да номинира 5 члена, а ДУИ и БЕСА по еден член.

-ВМРО-ДПМНЕ како победничка партија треба да има најмногу членови во комисијата како што има најмногу пратеници во парламентот – сметаат од ДПМНЕ.

Меѓутоа, со оваа поделба не се согласува ДУИ, од каде стојат на ставот дека тие треба да имаат еден член повеќе на комисијата за сметка на ВМРО-ДПМНЕ, односно ВМРО и СДСМ да имаат по 5 члена, ДУИ два, а БЕСА еден.

-Така би било најисправно, бидејќи ДУИ освои многу повеќе гласови во споредба со БЕСА, и во апсолутна и во процентуална смисла, отколку што освои ВМРО во однос на СДСМ – вели висок функционер на „интегративците“.

Доколку партијата се избори за два члена на комисијата, тие ќе го имаат главниот збор при одлучувањето, со оглед дека во таква ситуација ВМРО и СДСМ би имале сооднос на паритетна основа, а едниот член на БЕСА не би правел никаква разлика.

Инаку, од редовите на ДУИ треба да дојде и новиот собраниски спикер, а како најсериозен кандидат се споменува Талат Џафери.

В.С.

 

Поврзани новости