Сопругата на рускиот опозиционер Алексеј Навални ги повика Русите да се приклучат на протестот на 17 март, денот на изборите и да гласаат против рускиот претседател Владимир Путин или да ги уништат нивните гласачки ливчиња.
Јулија Навална во видеото на Јутјуб вели дека црпи надеж од големиот број луѓе кои се појавија минатата недела на погребот на нејзиниот сопруг, кој почина во арктичкиот затвор на 16 февруари. Неговиот гроб оттогаш е покриен со море од цвеќиња.
Таа ги повика Русите да се приклучат на протестот на 17 март, на кој што Навални повика непосредно пред неговата смрт.
17 марта. Полдень. За Навального. pic.twitter.com/9fxFxt0NOY
— Yulia Navalnaya (@yulia_navalnaya) March 6, 2024
„Мора да го искористиме денот на изборите за да покажеме дека постоиме и дека нè има многу. Ние сме вистински, живи луѓе и сме против Путин. Мора да пристигнете на гласачкото место тој ден во исто време, на 17 март напладне” рече таа.
Нејзиниот сопруг имал идеја дека демонстрантите на тој начин ќе го избегнат ризикот од апсење.
„Можете да го уништите ливчето, на него да напишете „Навални“ со големи букви. Што да направите следно? Изборот е ваш. Можете да гласате за кој било кандидат освен Путин. Можете да го уништите гласачкото ливче, да напишете „Навални“ на него со големи букви. Дури и ако воопшто не ја гледате смислата на гласањето, само дојдете и застанете покрај гласачкото место и потоа одете дома“.
По смртта на нејзиниот сопруг, Навална најави дека ќе ја продолжи неговата борба. Таа се појави на голем број политички настани на Запад, вклучувајќи ја безбедносната конференција во Минхен и Европскиот парламент, а се сретна и со американскиот претседател Џо Бајден. Кремљ ги отфрла тврдењата на Навална дека Путин го убил нејзиниот сопруг и одби да го коментира јавниот одговор за неговата смрт и погребот.