ВИДЕО: МВР уапси седум помагачи на терористите од Дива населба

by Фокус 17:00
17:00

Во акцијата „Молња“, која МВР ја спроведе утрово, уапсени се седум лица, кои сега се сомничат за извршување на кривични дела „терористичка организација“ и „тероризам со помагање“. Приведените се на возраст од 20 до 74 години. Три од нив се од кумановското село Отља, две од скопско Брест и по едно од Арачиново и Матејче. За нив веќе е побарано да се одреди мерка притвор.

Според МВР, целта на оваа акција била  да ја открие целокупната мрежа на соработници и помагачи на криминално-терористичката група од кумановската Дива населба, која на 9. и 10 мај годинава се судри со полицијата.

- Advertisements -

-Осомничените главно имале улога на логистичари, односно при двата кривично-правни настани и помагале на групата во извршувањето и прикривањето. Освен помагањето на криминално-терористичката група од Дива населба, еден од осомничените имал обиди во текот на полициската акција да мобилизира помлади лица и со таа група да изврши напади во Скопје, да ја дефокусира полицијата и да ја намали нејзината сила во напорите за совладување на вооружената група во Куманово, соопшти денеска МВР.

При спроведувањето на акцијата и при апсењето на осомничените немало никакви инциденти, а поголемиот дел од осомничените веќе и се познати на полицијата и против нив во повеќе наврати се поднесувани разни кривични пријави за кои им се изрекувани и затворски казни.

Во акцијата против криминално-терористичката група во Дива населба, која беше спроведена во мај годинава, осум полицајци беа убиени, а триесетина беа повредени. Беа убиени и десет члена на терористичката група, а триесет се предадоа и за нив во тек е судска постапка.

 

Поврзани новости