Во Министерството за одбрана со свечена церемонија на која се обратија првиот вицепремиер за европски прашања, Бојан Маричиќ, министерката за одбрана Славјанка Петровска и директорот на Генералштабот на Армијата, бригадниот генерал Симеон Трајковски, беше одбележана 4-годишнината од членството на Северна Македонија во НАТО и Денот на Генералштабот на Армијата.
„Денеска е посебен ден за сите наши граѓани кои сакаат мирна, стабилна и просперитетна држава. Денес, ние сите заедно сме поспокојни знаејќи дека сме дел од најнапредната, најмоќната одбранбена воено-политичка Алијанса во светот. Затоа што сме меѓу демократите, визионерите, но и затоа што сме тука сите за еден и еден за сите, рамо до рамо со најразвиените во светот.
Војните и жариштата кои повремено пуштаат по некоја искра, сликите на ужасот и човечкото патење, кај секој еден од нас предизвикуваат длабока тага од една страна, но и свесност дека членството во НАТО е најдобрата цел која сме успеале да ја обезбедиме за нашите граѓани. Секоја тешка одлука која не доведе денеска тука – вредеше!“ рече Маричиќ.
Вицепремиерот Маричиќ говореше и за јубилејната годишнина на НАТО. „Алијансата која оваа година ја слави јубилејната 75 годишнина од своето основање и започна со 12 членки денеска брои 32, и побројна, поголема и пообединета од било кога досега. Бруталната воена агресија која Русија ја врши врз Украина го наруши мирот на европско тло, но не успеа да го разори НАТО, туку спротивно, придонесе за НАТО кое е посилно и визионерско.
Обединетоста на сите наши сојузници не мотивираше сите да сме подобри и да зацртаме јасни планови и патишта за долгорочно движење на Алијансата кое е спремно брзо да одговори на секој предизвик кој го носат современите закани и актери. Сеедно дали тие доаѓаат од море, небо, копно или од дигиталниот простор. И токму затоа НАТО е најмоќниот политичко-воен сојуз кој го чува мирот на над 1 милијарда граѓани со демократски вредности“, рече Маричиќ.
Осврнувајќи се на важноста на 27 март, министерката Петровска рече дека овој датум е од историска важност во создавањето на суверена и независна држава.
„Додека во сите поранешни републики, по распадот на Југославија беснееја војни, благодарејќи на мудрите одлуки на првиот претседател Киро Глигоров, и првиот министер за одбрана Трајан Гоцевски, последниот војник на поранешната ЈНА, на мирен начин замина од територијата на независна и суверена Македонија, со што се создадоа услови за формирање на Армијата на Република Македонија. Првиот 27 март ја потврди нашата одлучност за независна и самостојна држава, а вториот 27 март ја зацврсти нашата безбедност и стабилност“, порача Петровска.
Таа подвлече дека токму на овој ден, пред четири години, Северна Македонија покажа каде припаѓа, кои се нашите вредности и кое е нашето место како земја која отсекогаш се залагала за мир, за демократија и за безбедност.
Во рамките на денешната свеченост, за прв пат беше одбележан и Денот на Генералштабот на Армијата – 28 март, а по тој повод директорот на Генералштабот, бригадниот генерал Симеон Трајковски, во своето обраќање направи ретроспектива на развојот на ова највисоко стратешко тело во Армијата и порача дека Генералштабот останува целосно посветен на исполнување на сите задачи и обврски во остварувањето на стратешките определби на Северна Македонија.