Граѓаните веќе подолг период се жалат на бавната процедура на услугите на Управата за матична евиденција, за извод од матична книга на родени. Како што тврдат, понекогаш се чека и повеќе од една недела за умреница, а овие документи се итно потребни за завршување на други административни потреби.
– Почина мајка ми и за да ја извадам умреницата ми побараа оригинален извод од венчани за кој ме упатија во сосема друга општина и наместо да се заврши побрзо јас во целата таа болка и со оглед на заразата од корона морав да патувам. Навистина не разбирам зошто не можеа директно преку системот на исто место да ги добијам и двата документи, појаснува скопјанка за „Фокус“ соочена со бавната процедура за документите.
Граѓаните се жалат дека предолго се чека добивањето на изводи дури и по електронски пат. Според нив, процедурата некогаш трае и по 10 дена.
– Поднесовме електронски за извод од матична книга на родени, но толку долго траеше процедурата што го испуштивме рокот за пријавување на мерката за владина помош. Не ми е јасно во време на пандемија зошто ова не може да биде поедноставно или барем да има некои олеснителни околности, вели граѓанин за „Фокус“
Од УМВК појаснуваат дека процедурата е побавна поради намалениот број на кадар кој активно оди на работа.
-Вработените во УВМК како и сите се болни од ковид и имаме вработени во изолација. Значи работиме со помалку кадар и тој се ротира преку еден ден. Во матичното одделеније во Центар, Скопје, најголем е притисокот, затоа што се заведуваат речиси 2/3 од раѓањата и смртните случаи, особено сега во ковид пандемијата. Исто како и за останатите изводи и за умреница граѓаните може да аплицираат електронски и да ги добијат во местото каде аплицирале или по пошта. Изводите сега се изработуваат за максимум 7 работни дена. За пријавување на новороденче или пријавување на смрт не се аплицира електронски затоа што за ова се потребни и други документи, велат во својот одговор за „Фокус“ од управата за матична евиденција.
С.Т