Долго траеше, не баш глатко – вака лидерот на ДПА Мендух Тачи го опиша вчерашниот состанок во СДСМ со коалициските партнери во врска со влегувањето на Алтернатива во Владата.
-Добрата вест е што сегашното мнозинство обезбеди стабилно мнозинство и тоа е добра вест за граѓаните и за процесот. Кога се прават договори, секој си го толкува договорот како што сака. Мене ми е важно да се знае дека Албанците не добиваат, а Македонците не губат позиции. Некои велат дека Алтернатива зеле многу места, но тоа не е точно. Далеку сме од оној процент што е договорен од Охридскиот договор. Сега имаме стабилна Влада и стабилни институции – вели Тачи.
Тој додаде дека Зоран Заев има намера да си замине од позицијата, но тоа ќе зависи од ситуацијата со Бугарија и нејзиниот развој. Според лидерот на ДПА, владиното мнозинство може да стигне до 70 пратеници.