СЗО: Се намалува ширењето и смртноста од Ковид-19 во Европа

by fokus 14:29
14:29

Заразноста од Ковид-19 и смртните случаи како резултат на инфекцијата се намалуваат во Европа, изјави директорот на Регионалната канцеларија за Европа на Светската здравствена организација (СЗО) Ханс Клуге на брифинг во Копенхаген.

– Иако секоја недела се пријавуваат повеќе од еден милион инфекции во европскиот регион, вкупната заразност од Ковид-19 се намалува веќе четири последователни недели, а бројот на нови смртни случаи е намален во рамките на две недели, рече Клуге.

- Advertisements -

Според податоците од речиси 20 земји, бројот на хоспитализации поради Ковид-19 се намалил од 13 на 11 на 100.000 луѓе помеѓу 18 и 31 јануари.

Во исто време, како што рече Клуге, загрижувачко е ширењето на мутираните соеви на коронавирусот. Откривањето на јужноафриканскиот вид е регистрирано во 19 европски земји.

Шефот на Европското биро предупреди на опасноста од пребрзо укинување на ограничувачките мерки.

– Морам да повторам дека одлуките за укинување на јавните здравствени и социјални мерки мора да бидат поткрепени со докази засновани врз епидемиолошка проценка и капацитетот на здравствениот систем. Критериумите мора да се засноваат на докази, а не на набљудувања на релативниот напредок, рече тој.

Според последните податоци, во 29 од 37 земји каде во моментов се врши вакцинација во европскиот регион, 7,8 милиони луѓе – 1,5 отсто од населението се вакцинирани против коронавирус. Бројот на ставени вакцини го надмина бројот на пријавени случаи – 41 милион дози вакцини во споредба со 36 милиони инфекции.

Според СЗО, заклучно со 10 февруари, во 17 земји и територии на европскиот регион, бројот на заразени лица за 14 дена изнесува повеќе од 400 регистрирани случаи на 100.000 луѓе.

Поврзани новости