Светските лидери имаат одговорност да се справат со ризиците од вештачката интелигенција, изјави денеска британскиот премиер Риши Сунак на последниот ден од инаугуративниот самит за безбедност во областа на вештачката интелигенција (АИ) во паркот Блечли, недалеку од Лондон, пренесува Танјуг.
„Сакав да разговараме за ова прашање на специјална седница како лидери со заеднички вредности, приватно“, рече Сунак на самитот во Блечли парк.
Тој рече дека лидерите имаат одговорност да се справат со „опасностите кои се движат од социјална штета и дезинформации, до екстремни ризици од вештачката интелигенција“.
Сунак рече дека сака сите да погледнат наназад на овој момент за пет години и „да знаат дека се избрани вистинските опции за целосно искористување на вештачката интелигенција на начин кој ќе биде безбеден за нашите заедници, но исто така ќе обезбеди огромен потенцијал“.
Некои технолошки и политички лидери предупредија дека брзиот развој на вештачката интелигенција претставува егзистенцијална закана доколку не се контролира.
Претседателката на Европската комисија Урсула фон дер Лајен, американскиот потпретседател Камала Харис, генералниот секретар на ОН Антонио Гутереш и другите лидери се очекува да разговараат за планот за тестирање и оценување на моделите на вештачка интелигенција поддржани од државата на самитот пред да бидат пуштени на продажба, соопшти канцеларијата на Сунак.
Фон дер Лајен рече дека е неопходно да се воспостават безбедносни стандарди за вештачка интелигенција кои се прифатени низ целиот свет.
„Сложените алгоритми никогаш не можат исцрпно да се тестираат, затоа прво мораме да се погрижиме програмерите брзо да реагираат кога ќе се појават проблеми, и пред и откако нивните модели ќе бидат пуштени на пазарот“, додаде таа.
Претставниците од компаниите поддржани од Мајкрософт како OpenAI, Anthropic, Google DeepMind, Microsoft, Meta и kAI требаше да се приклучат на подоцнежна сесија.
На завршната сесија на дводневниот самит за вештачка интелигенција е закажан разговор меѓу Сунак и американскиот бизнисмен Илон Маск.