Стотици луѓе се уапсени на протест во Лондон организиран во поддршка на групата „Палестинска акција“, која неодамна беше забранета од британската влада. Метрополитенската полиција потврди дека дури 474 лица се приведени, што е најголем број апсења во еден ден во последните десет години, пишува БиБиСи.
Според полицискиот извештај, 466 демонстранти се уапсени за поддршка на забранетата организација, петмина за напад врз полицајци, двајца за нарушување на јавниот ред и мир и едно лице за кривично дело мотивирано од расна омраза. Ниеден полицаец не е сериозно повреден.
Меѓу уапсените е и 89-годишна жена, објавија британските агенции. Протестот, организиран од групата „Заштитете ги нашите поротници“ на Парламентарниот плоштад во Вестминстер, собра помеѓу 500 и 600 луѓе. Точно во 13 часот, додека ѕвонеше Биг Бен, стотици демонстранти истовремено држеа рачно напишани знаци на кои пишуваше „Се спротивставувам на геноцидот. Ја поддржувам Палестинската акција“.
Фото: БиБиСи
Снимките од плоштадот покажаа дека полицијата се движи меѓу демонстрантите, кои претежно мирно седеа на земја. По кратки разговори, полицијата почна да ги приведува. Демонстрантите трпеливо чекаа на својот ред, а оние што одбија да станат беа изведени од толпата од полицијата, извикувајќи „срам да ви е“.