Репрезентацијата на Бразил ја победи Јапонија со 2:1 во драматичен натпревар од Светското првенство, а Габриел Мартинели го постигна победничкиот гол во шестата минута од судиското продолжение. Јапонија водеше на полувреме, но Бразил успеа да го сврти резултатот во второто полувреме и да се пласира во осминафиналето.
Бразил ја презеде контролата врз поседот од самиот почеток, но тешко се пробиваше низ цврстиот блок на Јапонија. Бруно Гимараеш ја имаше првата шанса во 2-тата минута, но неговиот удар беше блокиран. Во 14-тата минута, Матеус Куња исто така се закани, но голманот Зајон Сузуки го одбрани неговиот обид.
Клучниот момент од првиот дел се случи во 29-тата минута. Данило ја загуби топката во средината на теренот, што отвори простор за брз контранапад на Јапонија. Топката ја повлече Каишу Сано и со прецизен удар од далечина го провери Алисон за водство од 1:0. До крајот на полувремето, Бразил не успеа да создаде конкретна можност, оставајќи впечаток на беспомошност пред организираната јапонска одбрана.
Во продолжението, Бразил влезе многу порешително, а селекторот веднаш го внесе Ендрик наместо Пакете на полувремето. Притисокот се исплатеше и Бразил создаде две одлични шанси. Прво, во 52-та минута, Сузуки брилијантно го одбрани ударот со глава на Гимараеш, а само две минути подоцна, Томијасу ја расчисти топката од гол-линијата по обидот на Касемиро.
Израмнувањето дојде во 56-та минута. По центаршут кон втората статива, Касемиро со навремен скок ја испрати топката во мрежата за да го направи резултатот 1:1. Веќе во следниот напад, Винисиус имаше шанса за целосен пресврт, но Сузуки повторно беше на висина на задачата. По фуриозниот почеток на второто полувреме, Јапонците се разбудија и се заканија преку Ајасе Уеда, а темпото на играта потоа падна, додека двата тима направија голем број измени.
На крајот од играта, Бразил повторно го зголеми притисокот. Во 85-тата минута, Рајан шутираше директно кон голот од слободен удар, но јапонскиот блок ја одби топката во корнер. Се играа шест минути од судиското продолжение, а кога се чинеше дека натпреварот ќе заврши нерешено, Бразил успеа да победи.
Во последните моменти, во 96-тата минута, Јапонците ја загубија топката во опасната зона. Гимараеш му асистираше на Габриел Мартинели, кој остана сам на втората статива и без проблеми постигна гол за конечни 2:1 и големо славје за Бразилците.
Со оваа победа, Бразилците се пласираа во осминафиналето на Светското првенство, каде што ќе играат против победникот од натпреварот меѓу Норвешка и Брегот на Слоновата Коска.
Таа средба ќе се одржи на 5 јули во 22 часот во Њујорк.