Велковски: Не се укинува вториот пензиски столб, само се префрла во друг закон

by valentina 21:03
21:03

Вториот пензиски столб нема да се укине, а придонесот од шест проценти што се издвојува за приватните пензиски фондови ќе продолжи да биде законски регулиран. Министерот за социјална политика, демографија и млади Ѓоко Велковски појасни дека со предложените законски измени се предвидува префрлање на одредбата за овој придонес во друг закон, без укинување на задолжителното пензиско штедење.

Со членот 17 од предлог-законот за изменување на Законот за пензиското и инвалидското осигурување се предлага бришење на постојниот член 120, со кој е утврдена стапката на придонесот за вториот пензиски столб. Според Велковски, станува збор за законско и техничко усогласување на регулативата, а не за промена со која би престанале уплатите во приватните пензиски фондови.

„Станува збор за пренесување на законската одредба во друг закон, а не за укинување на пензискиот столб“, нагласи министерот во писмената изјава.

Предвидено е стапката од шест проценти да биде регулирана со нов член 25-а во Законот за придонеси од задолжително социјално осигурување. Соодветните предлог-измени се очекува наскоро да бидат објавени на Електронскиот национален регистар на прописи (ЕНЕР), но засега не е прецизиран датумот на нивното објавување. Промените се поврзани со поширокото усогласување на системот за наплата и распределба на задолжителните социјални придонеси.

За граѓаните што се членови на вториот пензиски столб, најавеното решение предвидува задржување на досегашното издвојување средства на нивните индивидуални пензиски сметки. Според важечките стапки, вкупниот придонес за пензиско и инвалидско осигурување изнесува 19,9 проценти од основицата за пресметка, од кои шест процентни поени се наменети за вториот столб, а преостанатите 13,9 за државниот пензиски фонд. Средствата во вториот столб се инвестираат преку приватните пензиски фондови и се наменети за обезбедување дел од идните пензиски примања.

Засега станува збор за предложени законски измени, а не за веќе усвоено решение. Конечната содржина на новиот член 25-а ќе биде позната по неговото објавување, кога ќе може да се утврди како точно ќе биде регулирано натамошното издвојување на придонесот од шест проценти.

Слични вести