Со кризата од корона вирусот угостителството е еден од најпогодените сектори во Македонија. Со тоа, многу вработени ја изгубија својата работа, а сопственикот на ресторанот „Мал Алтан“, Горан Блажевски направи потег кој секако е за големо поздравување.
Тој на својот фејсбук-профил информираше дека нема да ги отпушти своите вработени, па дури и бизнисот да му пропадне.
„Фокус“ направи краток разговор со него, во кој ни ги објасни причините за ваквата одлука.
„Ресторанот работи шест години. Мислам дека по толку време не е во ред така лесно да се откажеш од вработените. Јас имам осум луѓе кои работат и периодов ќе ги плаќам од свој џеб. Сакам да испаднам фер, затоа што не се тие виновни. Греота е да им го земеш лебот “, вели Блажевски.
Како што вели сопственикот на овој ресторан, угостителите мора да се потрудат да ги задржат своите вработени.
„Последните два месеци угостителството работи со големи загуби. Работевме по 6-7 часа и сметам дека треба да се избориме да ги сочуваме вработените, затоа што полошо ќе поминеме. Многу тешко се наоѓаат работници. Голем дел од угостителите ќе треба да се задолжуваат за да опстојат. Тешко дека ќе имаме туристи ова лето со моменталната ситуација“, додаде Блажевски.
Владата заедно со претставници на туристичкиот-угостителски сектор деновиве преговараат за да се донесе најдобро решение за овој сектор.
Од Македонија се почести се случаите на заминување на угостителите и работење на брод во странските земји во летниот период. Според Блажевски, нема голема разлика работата на брод со работењето во нашите угостителски локали.
„Се согласувам дека платата во странство е поголема. Но, за таа плата тие работат по 12, 15, а некогаш и 20 часа. Спијат по многу луѓе во иста соба, а во Македонија ќе ја земат истата плата. Знам дека угостителските работници земаат солидни плати во земјава“, го заврши разговорот Блажевски.
Јорданчо Цветаноски