Доколку до понеделник, не се реши проблемот со тројцата универзитетски професори Крсте Шајноски, Маргарита Матлиеска и Александар Костадиновски од Економскиот факултет при штипскиот Универзитет кои веќе осум дена штрајкуваат со глад, од вторник на нив ќе им се придружи и Советот на Синдикатот за образование и наука (СОНК) врз основа на солидарност. Тоа значи, дека доколку до вторник не бидат избрани во повисоко звање, сите претседатели на региони, (околу 20) и секретари ќе стапат во штрајк со глад.
Ваква одлука е донесена на денешната седница на СОНК со претседателите на регионите на која присуствуваа и тројцата избркани професори. Нивната здравствена состојба од ден на ден се повеќе се влошува. Тие имаат вртоглавица, главоболка, тахикардија бидејќи цела недела не ставиле залче во уста.
Тие бараат до 2 август да бидат унапредени, иако ректорот на штипскиот Универзитет Саша Митрев тврди дека до 7 август се на колективен одмор и не можат до тогаш да постапат по решението на Државниот просветен инспекторат. Работата се проблематизира, бидејќи ако тие до 2 август не бидат избрани во повисоко звање, тогаш ќе треба да се поништи конкурсот и целата постапка да почне од почеток.
Тројцата професори поддршка добија од дел од своите колеги од академската фела, како и од апсолвентите на Економскиот факултет.