Шпанија понуди поддршка за членство на Македонија во ЕУ, Заев во прва посета на Мадрид

Министерката за надворешни работи на Шпанија, Аранча Гонзалес Лаја, изрази поддршка за пристапување на Македонија во Европската унија, објави шпанското МНР по нејзината средба со вицепремиерот за европски прашања Никола Димитров.

„Министерката Аранча Гонзалес Лаја ја понуди поддршката и искуството на Шпанија за унапредување на процесот, во области како што се судскиот систем, владеењето на правото, зелената агенда или дигитализацијата“, објави шпанското МНР на „Твитер“.

Премиерот Зоран Заев, заедно со вицепремиерот Димитров, денеска од Брисел замина во посета на Мадрид, што претставува прва посета на Кралството Шпанија на премиерско ниво.