Екипи на Град Скопје во соработка со општествено одговорни компании веќе два дена темелно ги отстрануваат остатоците од дивата населба под скопското Кале, која почна да се расчистува во големата акција на администрацијата за чистење на градот во текот на минатиот месец. Градоначалникот на Скопје Петре Шилегов денеска најави засилени инспекции и казни за сопствениците на приватни имоти кои ќе дозволат на нив да се создаваат диви населби и депонии.
– На ова место со децении наназад имаше дива населба во која живееја бездомни лица, а која беше претрупана со отпад и беше извор на аерозагадување. Во текот на овој месец успеавме да не дозволиме на ова место повторно да се населат бездомни лица кои се згрижени во капацитетите на Министерството за труд и социјална политика. Од вчера заедно со општествено одговорните градежни фирми кои соработуваат со Градот Скопје, на моја молба, започна целосно и темелно расчистување на оваа локација. Досега, во текот на овие два дена имаме подигнато над 500 кубни метри смет. Очекувам дека во наредните десетина дена ќе завршиме со расчистување на овој терен, истакна Шилегов.
Посочи дека местото што се чисти е во приватна сопственост и целиот потег од левата страна на Вардар почнувајќи од хотелот „Александар Палас“ па се до мостот „Гоце Делчев“ е поранешно државно градежно земјиште кое е продадено на приватни физички и правни лица. Истакна дека ова е последен пат градот да интервенира, и откако ќе ја доведат состојбата во нормала ќе ги задолжат сопствениците за одржување и ќе почнат да изрекуваат казни, доколку не се чисти земјиштето.
– За тоа писмено се известени сите сопственици на земјиштето, ја користам можноста и јавно да ги известам за да немаме утре некакви недоразбирања, затоа што мислам не треба да правиме компромис. Доколку некој го купил ова земјиште треба да го одржува и да не дозволува на него да се случуваат работи какви што се имаат случувано.
Сопственик на земјиштето, рече Шилегов, е „Амадеус груп“, со кој веќе разговарал на оваа тема и оти нема да дозволи како градоначалник повторно никнување дива депонија. Најави дека инспекциските служби засилено ќе работат, а казната е 15.000 евра доколку не се одржува комуналниот ред на приватна земја.
Додаде дека сите 200 лица што биле на ова земјиште се згрижени по институциите. – Карактеристично е дека дел од тоие воопшто немаат потреба од згрижување, туку имаат свои домови на други места од градот но зошто го одбираат овој начин веројатно тоа им е начин како да заработуваат со палење кабли, со палење гуми, но не можеме да го дозволиме тоа. Далеку од тоа дека сум задоволен, но годинава имаме поквалитетен воздух и тоа е дел од стратегијата што ја спорведе градот – спречување на она што традиционално ни се случувало, а тоа се огнови на отворено, подвлече Шилегов.
Истакна дека вакви големи жаришта има во Визбегово, тоа е депонија што е создавана 30 години, и очекува дека годинава во соработка со Министерството за животна средина ќе почне да се решава.
– Вардариште е покомплексно прашање што не дозволува имроповизација зашто станува збор за проанешна депонија на градот Скопје, каде што градот депонирал отпад повече од 40-50 години и мислам дека тука ќе ни треба и експертиза и акција со меѓународна помош, затоа што проценката што ја имаме направено е таму за да се санира целокупно состојбата, е 40 милиони евра за да може целосно да се заштити тој потег од подводен слив за да не предизвикува загадување на животната средина, рече Шилегов.