Уредникот на ТВ Сител и професор на Европскиот универзитет Драган Павловиќ Латас поседувал огромен луксузен имот за кој тешко можат да се најдат конкретни податоци за големината и бројот на парцели во институциите, обвини СДСМ уште пред три години.
Портпаролот на СДСМ Петре Шилегов на прес конфернеција во 2014 година излезе со документи за имотите кои ги поседуваат Павловиќ Латас и неговиот брат повикувајќи ги институциите да одговорат зошто имотните листови не содржат детални информации за видот и големината на имотот.
-Латас немал само 4 фирми кои функционирале на познатата адреса Градски стадион без број. Куќниот пријател на премиерот Никола Груевски, уредникот Драган Павловиќ, немал само една фирма преку која свртел 250 илјади евра во една година.
Павловиќ и неговото семејство немале само 3 стана во вредност од околу 400 илјади евра.
Заедно со својот брат, медиумскиот могул на ВМРО-ДПМНЕ поседува недвижен имот со површина од над 7.000 метри квадратни во општина Зелениково.
Илјадници метри квадратни, во најголем дел купени во 2011 и 2012 година. Во истите години кога Павловиќ свртел 250 илјади евра и кога семејството Павловиќ се стекнале со два стана.
Според овој имотен лист, број 135, од катастарска општина Градовци, Драган Павловиќ Латас поседува градежно неизградено земјиште од 4.803 метри квадратни во местото Гуменја. Неговиот брат, на истото место, Гуменја, поседува 2.205 метри квадратни, исто така градежно неизградено земјиште.
Дополнително, според овој имотен лист, браќата Павловиќ поседуваат и друг недвижен имот, во истата општина, кој наводно го купиле со Договор за купопродажба склучен во ист ден, 2010 година.
Но, овој имотен лист, број 328, катастарска општина Грдовци, открива и нов скандал. Имено, никаде во имотниот лист не стои што всушност поседуваат браќата Павловиќ и со која квадратура. Воопшто не е наведен бројот на катастарската парцела, катастарската култура, намената, површината.
Дополнително, семејството Павловиќ поседува и друг недвижен имот, со незапишани права, и, исто така со непозната квадратура.
И скандалот не завршува тука.
На дел од имотот на браќата Павловиќ изградени се луксузни куќи, за кои не може да се потврди дали се легални, дали се во фаза на легализација или воопшто не фигурираат како имот.
Јавно прашуваме, дали сите овие луксузни објекти се изградени на имотот на Павловиќ и поседуваат ли газдите имотен лист за нив?
Која државна институција одобрила впишување на имот за кој нема информација колкав е и за каков имот станува збор?
Со овој нов скандал, медиумската корупција на Владата на Никола Груевски добива нова димензија за која државните органи и институции треба да дадат одговори.
Дали Драган Павловиќ Латас ги искористил врските со власта, на највисоко ниво и легализирал имот кој не може да се легализира?
Како тоа уредници на медиуми, успеваат да бидат и управители или сопственици на неколку фирми, да бидат и бизнисмени, да вратат по 250 илјади евра годишно, да имаат по неколку стана и да поседуваат огромно земјиште?
Зголемувањето на имотот на функционерите на ВМРО-ДПМНЕ оди рака под рака со зголемувањето на имотот на главните протагонисти на власта во медиумите. Очигледно, наклонетоста на медиумите и главните уредници има и трета димензија, а тоа е личното богатење, завршува Шилегов на денешната прес конференција.