Генералниот секретар на НАТО, Марк Руте, денеска изјави дека забрзувањето на производството и иновациите во одбранбениот сектор низ Алијансата е клучно за зајакнување на одвраќањето и гарантирање на колективната безбедност. Зборувајќи на Трансатлантскиот форум за пристап до одбранбената индустрија во седиштето на НАТО во Брисел, Руте ги повика одбранбените компании да го зголемат производството и да ја забрзаат испораката на воена опрема во светлината на растечките безбедносни предизвици.
„Кога вие – сите вие - произведувате повеќе, нашата одвраќачка и одбранбена позиција ќе биде посилна, а со тоа сите ќе бидеме побезбедни“, им рече Руте на претставниците на повеќе од 50 американски компании и белгиски индустриски партнери собрани да разговараат за трансатлантската одбранбена соработка.
Лидерот на НАТО истакна дека само посветеноста на одбраната нема да биде доволна ако не е придружена со значително проширување на индустриските капацитети. Осврнувајќи се на целта на алијансата да инвестира 5% од БДП во одбраната, договорена на минатогодишниот самит во Хаг, Руте рече дека претстојниот самит во Анкара следниот месец мора да се фокусира на конкретни воени капацитети и индустриско производство.
„Парите се клучни. Но, самитот следниот месец во Анкара нема да се занимава само со пари; тој мора да биде фокусиран на капацитетите за борбена подготвеност и значителното проширување на нашите одбранбени индустрии“, рече тој.
Руте потврди дека поголемите инвестиции во одбранбениот сектор не само што ќе ја зајакнат безбедноста, туку ќе ја поддржат и економскиот раст и вработеноста во земјите-членки на Алијансата. Тој, исто така, ја нагласи важноста на тесната трансатлантска соработка во одбранбеното производство и иновациите.
Руте се сретна и со лидерите на политичките групи на Европскиот парламент, каде што ја опиша соработката меѓу НАТО и ЕУ како клучна за заштита на безбедноста и слободата на граѓаните. На седницата со која претседаваше претседателката на Европскиот парламент, Роберта Мецола, Руте изјави дека европските сојузници ги засилуваат напорите за зајакнување на колективната безбедност и изградба на „посилна Европа во рамките на посилно НАТО“.
Тој повика на обновени напори за зајакнување на темелите на одбранбената индустрија, забрзување на иновациите и продлабочување на трансатлантската одбранбена соработка, истовремено поздравувајќи ги иницијативите на Европската Унија насочени кон зајакнување на одбранбената подготвеност.