Русите со дрон погодија автобус во Херсон – двајца загинати и петмина повредени

Две лица загинаа, а пет се повредени во руски напад со беспилотно летало врз автобус на јавен превоз во Херсон.

Нападот се случил утрово околу 7 часот во централниот градски округ, соопштија локалните власти, пишува Украинска правда.

Началникот на регионалната воена администрација на Херсон, Олександр Прокудин, ги објави деталите за нападот.

„Руските сили го нападнаа автобусот со беспилотно летало во Централниот округ на Херсон околу 7 часот наутро“, рече Прокудин.

Според првите извештаи, две лица загинаа, а пет се повредени.

Прокудин истакна дека оваа информација е во процес на проверка.

Овој инцидент се случил само еден ден откако, според претходен извештај на Прокудин, еден човек бил убиен во Херсон во руски напад врз приватен автомобил.