Театарската режисерка Зоја Бузалковска со писмо до премиерот Зоран Заев, поднесе оставка од Советот за култура поради Годишната програма на Министерството за култура, објави порталот Слободна Европа. Во писмото кое го објави на својот фејсбук профил таа меѓудругото пишува:
“Вие г-дине Заев, не ја ставивте културата ПОД ТОЧКА РАЗНО, вие ЈА ЖРТВУВАВТЕ! Секогаш кога Ви е потребен „пазар“ за одлуки и гласови, прво посегнувате по КУЛТУРАТА и по ОБРАЗОВАНИЕТО! Тоа само говори за тоа, колку Вие и не го разбирате нивното огромно, суштествено значење за една држава, и посебно за нашава, која претендира да биде дел од едно пошироко европско семејство (бидејќи, сфаќам, тоа Ви е во моментов најважно),” пишува Бузалковска.
Нецели 24 часа по ноќното објавување на резултатите од Конкурсот за проекти од национален интерес на Министерството за култура за 2019 , кулминира незадоволството во јавноста. Според програмата, укинати се бројни музички манифестации, а анонимни лица и фирми ќе добијат огромни средства од буџетот за култура на сметка на видни манифестации, како што се “Скопскиот џез-фестивал” и фестивалот „Оффест“, “Златно славејче”, “Здраво млади” и други.