Смртоносниот напад врз концертната сала во близина на Москва во петокот го извршија радикални исламисти, изјави синоќа рускиот претседател Владимир Путин, тврдејќи дека тие се обидувале да побегнат во Украина.
„Знаеме дека злосторството го извршиле радикални исламисти кои имаат идеологија против која самиот исламски свет се бори со векови. Знаеме кој го изврши ова злосторство против Русија и нејзиниот народ. Она што нè интересира е кој го нарачал“, рече Путин на состанокот на владата.
Според неговите изјави, напаѓачите се обиделе да побегнат кон Украина.
„Важно е да се одговори на прашањето зошто терористите се обидоа да заминат во Украина по злосторството? Кој ги чекаше таму?“, рече рускиот претседател, додека Киев негира каква било вмешаност во нападот.
Бројот на жртвите од нападот во Москва во понеделникот се зголеми на 139. Повредени се 182 лица.
Путин рече дека оние кои го планирале нападот се надевале дека ќе посеат паника и раздор во руското општество, но тој вели дека наишле на единство и одлучност да се спротивстават на злото.