Право на глас имаат 1.808.131 граѓани, за да се постигне цензусот треба да гласаат над 40%

Државната изборна комисија-ДИК денеска на седница го заклучи Избирачкиот список. Право да гласаат на шестите претседателски избори имаат 1.808.131 избирачи.

За претседател се избира кандидатот што добил мнозинство гласови од избирачите што гласале доколку гласале повеќе од 40% од избирачите.

Заклучениот Избирачки список, односно изводите од списокот на кој се гласа, ДИК треба да ги потпише 15 дена пред денот на изборите, односно најдоцна до 5 април.

В недела напладне во просториите на ДИК тројцата кандидати за претседател на државата – Блерим Река, Гордана Силјановска-Давкова и Стево Пендаровски треба да потпишат кодекс за фер и демократски избори.