Попладнево се очекува да заврши дводневната средба на мешовитата македонско-бугарска комисија за историски и образовни прашања и да се знаат повеќе детали дали историчарите во Клубот на пратениците имаат приближување на ставовите, особено за револуционерот Гоце Делчев.
Бугарскиот премиер Бојко Борисов на Фејсбук објави дека тој и германската канцеларка Ангела Меркел ги поддржуваат земјите од Западен Балкан на патот кон ЕУ.
– Бугарија активно ќе продолжи да работи во таа насока за време на нашето заедничко претседавање со Република Северна Македонија во Берлинскиот процес. Ги ценам напорите на германското претседателство со Советот на ЕУ за изнаоѓање најсоодветни решенија за заштита на здравјето на сите европски граѓани, како и на економскиот живот, наведува Борисов на својот фејсбук-профил.
Тој во објавата натаму додава дека на францускиот претседател Емануел Мекрон му порачел оти ЕУ треба да дејствува координирано во борбата против пандемијата, но дека и земјите членки не треба да бидат лишени од можноста сами да носат одлуки.