Министерот за правда Бојан Маричиќ денес се сретна и разговараше со Ана, една од дeвoјките жртви на групата „Јавна Соба“. Тој изворно се информираше за страдањето низ кое минува Ана, но и другите девојки чии фотографии и лични податоци беа злоупотребени во веќе затворената група.
„Имавме навистина искрен разговор и изворно ми ги раскажа сите страдања низ кој поминува откако нејзина фотографија и лични контакти се најдоа на оваа група, која по реакција на институциите веќе е затворена. И честитав на храброста јавно да проговори за нејзините страдања и дека нејзината реакција предизвика навистина силна општествена реакција.
Воедно разговаравме за законските измени кои Министерството за правда веќе подготви, а со кој се воведува и ново дело кое ќе биде дополнителна заштита, меѓу другите и за вакви случаи.
Во нив меѓу другото во КЗ се додава член 144А, во кој се вметнува терминот „Демнење“ и се објаснува дека тој што истрајно и за подолго време неовластено ќе следи, прогонува или на друг начин се меша во личниот живот на друг или со него воспоставува или настојува да воспостави од него несакан контакт со движење во просторот каде се наоѓа тоа лице, со злоупотреба на користење на личните податоци, со користење на телекомуникациски или други средства за комуникација или на друг начин психички го злоставува, вознемирува или застрашува и со тоа ќе предизвика чувство на несигурност, вознемиреност или страв за неговата сигурност или сигурноста на нему блиско лице, ќе се казни со парична казна или со затвор до три години.
Ана не е сама, Ана и сите жртви ја имаат поддршката. Заедно ќе се бориме додека не создадеме општество во кое ваквите појави ќе бидат целосно отфрлени и строго осудени“, напиша Маричиќ.