Папата Франциско порача дека за да се стави крај на војните како сегашната во Појасот Газа, потребно е решение кое ќе создаде две држави за Израел и Палестина и повика Ерусалим да добие посебен статус.
Во интервју за информативниот канал TG1 на италијанската државна телевизија РАИ, Франциско, исто така, рече дека се надева дека ќе избегне регионална ескалација на конфликтот, кој започна кога милитантите на Хамас влегоа во Израел, убивајќи околу 1.400 Израелци, главно цивили, а зедоа околу 230 заложници.
Тој, исто така, рече дека е загрижен за подемот на антисемитизмот и додаде дека смета дека многу од тоа „останува скриено“.
„Тоа се две нации кои мора да живеат заедно. Со мудро решение во две држави. Во согласност со договорите од Осло, две добро дефинирани држави и Ерусалим со посебен статус“, изјави Фрањо во интервју за италијанската РАИ.
Во 1993 година, израелскиот премиер Јицак Рабин и водачот на Палестинската ослободителна организација Јасер Арафат се ракуваа и се договорија за Договорот од Осло со кој се воспостави ограничена палестинска автономија.
Во 1967 година, Израел го окупираше арапскиот источен Ерусалим, а во 1980 година го прогласи целиот град за „обединета и вечна престолнина“.
Во исто време, Палестинците го гледаат источниот дел на градот како главен град на нивната евентуална идна држава.
Израел постојано ги отфрла предлозите според кои тој град, свет за сите монотеистички религии – за христијаните, муслиманите и Евреите, би можел да има посебен или меѓународен статус.