Владимир Панчевски, претседателот на Основниот суд Скопје 1 заедно со уште двајца инвеститори, бесправно и без дозвола направиле надградба на зградата на улицата Никола Вапцаров бр.6, тврди општина Центар во денешната реакција.
Панчевски и инвеститорите од Општина Центар, во јуни 2015 година, добиле одобрение за „реконструкција и санација на фасадата во рамки на постојниот габарит“, кое им следува законски. Со ова решение, вели општината, тие немале право да направат никакво проширување или надградување на објектот.
„Во средината на 2016 година, тие поднеле барање за надградба на објектот, кое во август 2016 година било одбиено и вратено на доработка заради јасно наведени недостатоци во проектната документација. Инвеститорите, меѓу кои и Владимир Панчевски, на своја рака решиле да си доградат уште два ката и поткровје, без да поседуваат соодветна дозвола за тоа. Инспекцијата на општината, согласно законските прописи и во рамки на своите надлежности, издала барање за рушење на доградените спратови. Законот важи подеднакво за сите и општината ќе постапи според законот“, информира општината Центар.
Во текот на вчерашниот ден, истражители од Основниот суд ја одзедоа документацијата за овој предмет. Образложението е дека се работи за судски предмет, за кој не можат да даваат информации.
