Поради недостиг на места во градинките и на барање на родители и градинките, Министерството за труд и социјална политика од Комисијата за заштита од заразни болести побарало мислење за евентуално зголемување на бројот на деца кои во услови на пандемија би можеле да посетуваат градинка, но Комисијата останала на ставот дека не треба да се зголемува бројката.
Според министерката за труд и социјална политика, Јагода Шахпаска, во моментов се јавува недостиг на места во градинките, иако, како што рече, има околу 9000 деца кои не одат во градинка, а согласно условите во протоколите обезбедиле место. Затоа апелираше родителите кои имаат друга алтернатива за чување на децата да ги отстапат местата на оние родители на кои им е неопходно да ги носат децата во градинка.
-На вчерашниот кризен штаб јас ги изнесов состојбите со градинките. Според протоколите 21.300 деца можат да бидат згрижени и да имаат безбеден престој во градинка. Вчерашните сознанија се дека 12.300 деца биле во градинка. Тоа говори за фактот дека повеќе од 9.000 деца согласно протокол имаат место, но не посетуваат градинка. Затоа ние упативме апел до граѓаните тие што имаат друга алтернатива и имаат кој да се грижи за нивните деца да им овозможат на другите родители на кои им е неоходно да можат да ги носат своите деца во градинка, рече Шахпаска.
За решавање на овој проблем рече, Министерството нема надлежност и тоа, како што посочи, треба да го направат општините како осоновачи и менаџментот на градинките.
Ние како Влада и како Министерство, рече Шахпаска, она што може да го направиме за намалување на притисокот за запишување деца во градинка е да отвораме нови установи. За неполни шест месеци рече, имаме отворено девет градинки со капацитет за 606 деца. Најави дека до крај на годината ќе бидат отворени дополнителни 13 детски градинки со опфат од околу 1400 деца.
