Комисијата за правосуден испит којашто ги испитувала кандидатите за полагање во 2015 година, кога правосуден испит положил синот на собранискиот спикер, Талат Џафери, нема никаква врска со документите на кандидатите, ниту ги прегледувала, ниту знаеле дали на кандидатот му е одобрено предвремено полагање на правосуден испит, вели во изјава за „Фокус“, поранешната претседателка на Кривичен, а потоа и на Врховен суд, Лидија Неделкова.
-Комисијата, односно членовите на истата ги испитуваат кандидатите за да го проверат нивното знаење по предметите кои се полагаат и тоа откако ќе извлечат лист со прашања, а може и дополнително да им се постават прашања. Секој член сам определува дали кандидатот има знаење и дали го положил предметот по кој испитува. Ако кандидатот не положил некој од предметите, се пријавува во следната сесија.
Комисијата нема никаква врска со документите на кандидатите ниту ги прегледува, ниту знае дали на некој му е одобрено предвремено полагање. За тоа е одговорен министерот за правда, а јас лично не се согласувам со предвремено полагање на правосудниот испит.
Се си пишува во Законот. Ниту како член, ниту како претседател на Комисијата не сум имала законско овластување тоа да го променам. Предвременото полагање законски може да се одобри ако кандидатот има целосно завршено соодветен Правен факултет, а како тогашниот министер тоа си толкувал треба него да го прашате, вели Неделкова во изјавата.
Според информациите коишто ги доби „Фокус“ од Министерството за правда членови на испитната комисија за правосуден испит во 2015 година при Министерството за правда биле:
Лидија Неделкова – претседател на Комисија и испитувач по предметот материјално и процесно кривично право
Иџет Мемети – член и испитувач по предметот уставно и управно право
Фаик Арслани – член и испитувач по предметот материјално и процесно граѓанско право
Јово Вангеловски – член и испитувач по предметот стопанско право
Николчо Николовски – член и испитувач по предметот трудово право
Александар Алексовски – Секретар на испитната комисија, се вели во одговорот од Министерството за правда.
Во 2015 година министер за правда бил Аднан Јашари, но во целата приказна, она што не може да се утврди е кој во Министерството за правда ги примил документите на Барлет Џафери и утврдил дека тој ги исполнил условите за да полага правосуден испит, па сите институции си ја префрлаат одговорноста.
Државната комисија за спречување на корупцијата утврди дека Барлет Џафери предвреме полагал правосуден испит, а спорни уверенија на Универзитетот на Југоситочна Европа во Тетово имале над 400 студенти на факултетот.
Ф.Ф.С.