Владо Димовски, наставникот по македонски јазик во „Алија Авдовиќ“ во селото Батинци, општина Студеничани, деновиве без објаснување добил отказно решение од работа. Димовски, кој во истото училиште е од 2008-ма година, смета дека е жртва на политички реваншизам и етничка дискриминација.
Во изјава за ЦИВИЛ, Димовски раскажува дека притисокот врз него почнал уште со неговото експонирање во граѓанскиот активизам и учеството на протестите на Шарената револуција. Тогаш му бил намален фондот на часови, а по изборите добил отказно решение.
Тој смета и дека, в.д. директорот Кенан Имери, член на ДПА и претседател на Советот на Општина Студеничани, етнички го дискриминира.
-Она што јас го почувствував како притисок од в.д. директорот Кенан Имери, сметам дека е голем чин на национална дискриминација, бидејќи во периодот додека работев таму, на голем дел на мои колеги кои се од албанска националност им беа издадени решенија, а на други колеги – не. И во последиве два месеца, од тоа училиште сме отпуштени четворица дипломирани професори, и сите припаѓаме на македонската заедница. На наше место се примени колеги од албанска националност, кои се со завршено средно образование, а ги предаваат нашите предмети – вели Димовски.
Наставникот на крајот порача, дека треба што поскоро да се расчисти со оние кои што праќаат националистички пораки, преку откази, казнувања и да се посветат на квалитетно образование.