Ладнокрвното убиство кое се случи вчера во Стара чаршија и денеска ја тресе јавноста. За настанот пишуваат и медиумите надвор од земјава, а еден од убиените го поврзуваат со позната старлета во Србија и реалити личност, Александра Николиќ. Како што пишуваат српските медиуми Јетон Кривањева бил во врска со Алекс Николиќ, која ја искусила на своја кожа неговата насилничка природа.
Српските медиуми потсетуваат на исповед која старлетата ја дала за годините кога била во врска со Кривањева. Таа на времето настапувала во клубови во Македонија, каде го запознала сега убиениот. Извесно време живееле заедно во Скопје.
-Поради него ја напуштив работата, бидејќи му сметаше тоа што танцував. Ми беше убаво со него година и пол, но го оставив затоа што ме претепа. Тоа го направи затоа што се умисли дека се загледувам во некое момче. Толку ме претепа што имав сериозна повреда на усната – изјавила Николиќ која поради ова ја завршила врската.
Таа додава дека Кривањева долго потоа и се заканувал дека ќе објави компромитирачки материјали за неа.
Кривањева, инаку, се поврзува со криминалното подземје. Тој и Енез Исени беа синоќа убиени во кафулето „Шиша бар“, кога неколкумина лица во фантомки влегле во објектот и ги застрелале во глава.
