Еден од најдобрите вокали кај нас, поп пејачката и солист во Македонска Опера и Балет, Наде Талевска Спасовска, вели дека во Македонија конечно доаѓа период за големи промени. И ја дава својата искрена поддршка на Шарената револуција, и верува дека дошло времето кога треба светот да се предаде на младите сили и мозоци, а небулозата со македонски плати и европски даноци да стане минато.
,,Со сигурност тврдам дека имаме доста квалификувани млади луѓе кои што можат да ја вратат насмевката и вербата кај народот. Сакам да ги растам моите деца во општество кое би било засновано на слобода, еднаквост, рамноправност, и тоа рамноправност на граѓаните за користење на јавните добра, општество каде моите деца би имале среќно и безгрижно детство, каде здравството и образованието би биле бесплатни или сведени на минимум давачки, и на тој начин подеднакво достапни за сите. Да нема повеќе Тамари, да нема Мартин! Правниот систем да работи на страна на ПРАВДАТА!,, – вели Наде, додавајќи дека нејзината слика за идеална држава според неа, сеуште е многу далеку од нас и нашето секојдневие, но се надева дека младите сили ќе донесат промени на подобро.
,,Нам ни треба општество на социјална правда каде што работничките права би биле поставени на прво место со цел да се сузбие сиромаштијата, каде капитализмот не би бил толку напреден и да престанат се богатат малкумина на грбот на мнозинството, каде луѓето не би му робувале на капиталот, туку самиот капитал би работел во служба на народот. Ни требаат плати и даноци кои што ќе бидат еднакво пропорционални, а не како во моментов – европски даноци, а македонски плати! Општество каде власта ќе служи на народот, праведни институции кои би функционирале за сите нас без неправда и корумпираност, за еднаквост и солидарност, општество каде национализмот би бил потиснат до моментот на негово целосно губење, како и сите останати форми на дискриминација,, – изјави за Фокус вокалистката.
Наде е присутна на сцената со години наназад. Има учествувано на голем број на фестивали за забавна музика и има освоено десетици награди. Лани на интернационалниот фестивал ,,Славјански базар,, во Белорусија ја освои наградата за најдобра изведба и претставување на вредностите од Македонија.