Влада без Албанците нема да има. Без разлика дали на идните избори ќе освојат 61 пратеник или не, од ВМРО-ДПМНЕ велат дека ќе се формира Влада со некои од албанските партии. Потпретседателот на партијата Тимчо Муцунски во емисијата 200 на Алсат изјави дека ВМРО-ДПМНЕ на следните парламентарни избори сака да соработува со албанската опозиција и не ја исклучи можноста од предизборни коалиции.
Тој исто така истакна дека според сите анкети на јавното мислење станува очигледно дека ВМРО-ДПМНЕ ќе биде победник на следните парламентарни избори и новото мнозинство ќе биде формирано врз основа на принципи и програма реформи на сите суштински прашања и борба против корупцијата.
„ВМРО-ДПМНЕ е политички субјект кој што според сите анкети на јавното мислење веќе станува ноторно и очигледно дека ќе победи на следните парламентарни избори. Потоа ќе влеземе во процес на формирање на влада каде што мандатар ќе биде претседателот Мицкоски, а начинот, а начинот на кој што ќе биде формирано новото мнозинство е врз основа на принципи и врз основа на програма, односно борба против корупцијата и реформа на сите суштински прашања коишто се од витално значење за напредокот на Република Македонија“, потенцираше Муцунски.