„Вчера се случи онаа фамозна Комисија што долго време ја најавуваа за уставни промени. Односно веќе една година слушаме од власта дека ќе стигне предлогот во Собрание, дека уставните измени се многу потребни во секој момент, веќе многу долг период се шпекулираше. Уставните амандмани за промена на Уставот наидоа на отпор кај граѓаните. А, вчера се докажа дека владиното мнозинство не само што нема 80 пратеници туку и дека со овој процес се удираат во ѕид“.
Ова денеска го истакна Владо Мисајлоски, пратеник и потпретседател на ВМРО-ДПМНЕ во емисијата „За или против“ на Алфа тв.
Тој додаде дека сите седум пратеници на ВМРО-ДПМНЕ кои што се во Комисијата гласаа против.
„Постојано се бориме за да објасниме не само во Македонија, туку и надвор од Македонија дека овој процес удира во ѕид. Затоа вчера кажавме, ајде што побрзо предлогот да дојде на собраниска седница. Зошто го велиме ова? За веднаш да се гласа, односно да се потврди дека владејачкото мнозинство во Собранието нема 2/3 мнозинство“, рече Мисајлоски.
Посочи дека е прашање дали и на 18-ти август ќе се случи седницата за уставни измени.
„Околу 80% од граѓаните се против овие уставни измени, зарем власта не ги гледа и не ги слуша граѓаните. Ние говориме за предлог кој што има отпор од сите граѓани“, појасни тој и праша зошто власта не го праша македонскиот народ за овој процес, туку самата го тераше.
„Ние сме против овие уставни измени, бидејќи се бугарски диктат“, потенцираше Мисајлоски.