Граѓаните на Словачка кои не учествуваа во масовното тестирање и немаат негативен тест за PCR, мораат да останат во изолација до 14 ноември, се наведува во директивата на Владата што беше издадена денеска.
На луѓето кои не го минале тестот им е забрането да одат на работа, но можат да одат во продавници и да купуваат основни производи или да ги посетуваат здравствените установи, пренесува Таср.
Од нетестираните граѓани се бара да бидат во своите домови најмалку 13 дена, иако стандардот за карантин за вирусни позитивни луѓе е 10 дена.
Владата наведува дека полицискиот час не е ист со карантинот и дека станува збор за две различни институции.
Бидејќи вториот круг од масовното тестирање нема да се одржи во цела Словачка, пунктовите на единиците за мобилно тестирање од 9 ноември ќе им бидат достапни на сите што сакаат да бидат тестирани. Исклучок од оваа одлука се лицата кои во последните три месеци прележале Ковид-19 и оние чија здравствена состојба исклучува тестирање.
